ನವದೆಹಲಿ: ಈ ತಿಂಗಳು ಎರಡು ಖಗೋಳ ಅದ್ಭುತಕ್ಕೆ ಸಾಕ್ಷಿಯಾಗಲಿದೆ ಜಗತ್ತು. ಹೌದು ಈ ತಿಂಗಳಲ್ಲಿ ಸೂರ್ಯಗ್ರಹಣ ಮತ್ತು ಚಂದ್ರಗ್ರಹಣ ಎರಡು ಕಾಣಿಸಿಕೊಳ್ಳಲಿದೆ.
ಮೊದಲು ʻರಿಂಗ್ ಆಫ್ ಫೈರ್’ ಎನ್ನುವ ವಾರ್ಷಿಕ ಸೂರ್ಯಗ್ರಹಣ ಉಂಟಾದರೆ ಕೆಲವೇ ದಿನಗಳ ಅಂತರದಲ್ಲಿ ಚಂದ್ರಗ್ರಹಣ ಕೂಡ ಸಂಭವಿಸಲಿದೆ. ಇದೇ ಅಕ್ಟೋಬರ್ 14 ಶನಿವಾರದಂದು ವರ್ಷದ ಕೊನೆಯ ಸೂರ್ಯಗ್ರಹಣ ಸಂಭವಿಸಲಿದೆ. ಇದನ್ನು ಸಾಮಾನ್ಯವಾಗಿ ‘ರಿಂಗ್ ಆಫ್ ಫೈರ್’, ವಾರ್ಷಿಕ ಸೂರ್ಯಗ್ರಹಣ, ಎನ್ನಲಾಗುತ್ತದೆ.
ಈ ದಿನ ಚಂದ್ರನ ಸುತ್ತ ಸೂರ್ಯನು ಬೆಂಕಿ ಉಂಗುರವನ್ನು ಸೃಷ್ಟಿಸಲಿದ್ದಾನೆ. ಗ್ರಹಣವು ಚಂದ್ರನ ಮೂಲಕ ಸಂಭವಿಸಲಿದ್ದು ಸೂರ್ಯ ಮತ್ತು ಭೂಮಿಯ ನಡುವೆ ಚಲಿಸುತ್ತದೆ. ಸೂರ್ಯನು ಭಾಗಶಃ ಮರೆಯಾಗುತ್ತಾನೆ ಮತ್ತು ಬೆರಗುಗೊಳಿಸುವ ಉಂಗುರ ಗೋಚರಿಸುತ್ತದೆ. ಇದೇ ಕಾರಣಕ್ಕೆ ಈ ಗ್ರಹಣವನ್ನು ‘ರಿಂಗ್ ಆಫ್ ಫೈರ್’ ಎಂದು ಕರೆಯಲಾಗಿದೆ.
ಅಮೇರಿಕಾದಲ್ಲಿ ಈ ಗ್ರಹಣವನ್ನು ನೋಡಬಹುದಾಗಿದೆ. ಇದು ಒರೆಗಾನ್ನಿಂದ ಟೆಕ್ಸಾಸ್ಗೆ USA ಅನ್ನು ದಾಟುವ ಕಿರಿದಾದ ಹಾದಿಯಲ್ಲಿ ಗೋಚರಿಸುತ್ತದೆ. ಇದು ನಂತರ ಮೆಕ್ಸಿಕೋದ ಯುಕಾಟಾನ್ ಪೆನಿನ್ಸುಲಾ, ಬೆಲೀಜ್, ಗ್ವಾಟೆಮಾಲಾ, ಹೊಂಡಾರುಸ್, ನಿಕರಾಗುವಾ, ಕೋಸ್ಟರಿಕಾ, ಪನಾಮ, ಕೊಲಂಬಿಯಾ ಮತ್ತು ಬ್ರೆಜಿಲ್ನ ಭಾಗಗಳನ್ನು ಹಾದುಹೋಗುತ್ತದೆ. ಅಮೆರಿಕದ ಇತರೆಡೆಗಳಲ್ಲಿ ಅಂದರೆ ಅಲಾಸ್ಕಾದಿಂದ ಅರ್ಜೆಂಟೀನಾವರೆಗೆ ಭಾಗಶಃ ಸೌರ ಗ್ರಹಣವು ಗೋಚರಿಸುತ್ತದೆ.
ಈ ಸೂರ್ಯಗ್ರಹಣ ಭಾರತದಲ್ಲಿ ಗೋಚರಿಸುತ್ತಿಲ್ಲ. ಆದಾಗ್ಯೂ, ಪಶ್ಚಿಮ ಗೋಳಾರ್ಧದ ಜನರು ಈ ವಿದ್ಯಮಾನವನ್ನು ಅನುಭವಿಸಬಹುದು ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.
ಸೌರ ಗ್ರಹಣ 2023 ದಿನಾಂಕ ಮತ್ತು ಸಮಯ: ಅಕ್ಟೋಬರ್ 14, ಶನಿವಾರ. ಸಮಯ: ಆನ್ಯುಲರ್ ಅಥವಾ ವಾರ್ಷಿಕ ಸೌರ ಗ್ರಹಣವು ಒಂದು ಸ್ಥಳದಲ್ಲಿ ಪ್ರಾರಂಭವಾಗುತ್ತದೆ ಮತ್ತು ಇನ್ನೊಂದು ಸ್ಥಳದಲ್ಲಿ ಕೊನೆಗೊಳ್ಳುತ್ತದೆ ಎಂದು NASA ಹೇಳಿದೆ. ಆ ಪ್ರಕಾರ ಸಮಯ ನೋಡೋದಾದರೆ, ಈ ಗ್ರಹಣ ಒರೆಗಾನ್ನಲ್ಲಿ 9:13 am (PDT) ಕ್ಕೆ ಪ್ರಾರಂಭವಾಗುತ್ತದೆ ಮತ್ತು 12:03 pm (CDT) ಗೆ ಟೆಕ್ಸಾಸ್ನಲ್ಲಿ ಕೊನೆಗೊಳ್ಳುತ್ತದೆ.
ಮುಂದಿನ ʻರಿಂಗ್ ಆಫ್ ಫೈರ್ʼ ಯಾವಾಗ? ಈ ಗ್ರಹಣ ಸಂಭವಿಸಿದ ನಂತರ ಮುಂದಿನ ಈ ಸೂರ್ಯ ಗ್ರಹಣ ಅಮೇರಿಕಾದಲ್ಲಿ ಜೂನ್ 21, 2039ಕ್ಕೆ ಸಂಭವಿಸಲಿದೆ. ರಿಂಗ್ ಆಫ್ ಫೈರ್ ಎಂಬ ಈ ಗ್ರಹಣವನ್ನು ಅಮೇರಿಕಾದಲ್ಲಿ ನೋಡಲು ಇನ್ನೂ 15 ವರ್ಷ ಕಾಯಬೇಕು.
ಇದೇ ತಿಂಗಳ ಚಂದ್ರಗ್ರಹಣ ಸಂಭವ…
ಇನ್ನೂ ಇದೇ ತಿಂಗಳ ಹದಿನೈದು ದಿನಗಳ ಅಂತರದ ಅವಧಿಯಲ್ಲಿ ಚಂದ್ರಗ್ರಹಣ ಕೂಡ ಸಂಭವಿಸಲಿದೆ. ಎರಡನೇ ಮತ್ತು ಕೊನೆಯ ಚಂದ್ರಗ್ರಹಣವು ಅಕ್ಟೋಬರ್ 28, 29 ರಂದು ನಡೆಯುತ್ತದೆ. ಈ ಗ್ರಹಣ ಭಾರತದಲ್ಲಿ ಸಂಭವಿಸಲಿದೆ, ಚಂದ್ರನು ಭಾರತೀಯ ಕಾಲಮಾನ 1.06 ಮತ್ತು 2.23ರ ನಡುವೆ ಭೂಮಿಯ ನೆರಳಿನ ಮೂಲಕ ಹಾದುಹೋದಾಗ ಭಾಗಶಃ ಚಂದ್ರಗ್ರಹಣ ಸಂಭವಿಸುತ್ತದೆ.
