ಬೆಂಗಳೂರು: ಜೀವನ ನಿರ್ವಹಣೆ ಕುಟುಂಬದ ಸಂಕಷ್ಟಕ್ಕೆ ಸಿಲುಕಿ ಸಾಕಷ್ಟು ಮಕ್ಕಳು ಅರ್ಧಕ್ಕೆ ಶಾಲೆ ತೊರೆದು ಕೆಲಸಕ್ಕೆ ಹೋಗುವ ಹಲವು ನಿದರ್ಶನಗಳು ನಮ್ಮ ಕಣ್ಣಮುಂದೆಯೇ ಇದೆ. ಈ ನಡುವೆ ಅರ್ಧಕ್ಕೆ ಶಾಲೆ ಬಿಟ್ಟು ತಿಂಗಳಿಗೆ ಕೇವಲ 8 ಸಾವಿರ ರೂ. ದುಡಿಯುತ್ತಿದ್ದ ವ್ಯಕ್ತಿಯೊಬ್ಬರು ಈಗ ದೇಶದ ಅತ್ಯಂತ ಕಿರಿಯ ಬಿಲಿಯನೇರ್ ಆಗಿದ್ದಾರೆ.
ಹೌದು, ಇತ್ತೀಚೆಗೆ ಫೋರ್ಬ್ಸ್ ವಿಶ್ವದಾದ್ಯಂತ 100 ಶ್ರೀಮಂತ ಭಾರತೀಯರ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಇದರಲ್ಲಿ ಝೆರೋಧಾ ಸಹ ಸಂಸ್ಥಾಪಕ ನಿಖಿಲ್ ಕಾಮತ್ ದೇಶದ ಅತ್ಯಂತ ಕಿರಿಯ ಬಿಲಿಯನೇರ್ ಆಗಿ ಹೊರಹೊಮ್ಮಿದ್ದಾರೆ.
ನಿಖಿಲ್ ಕಾಮತ್ ಅವರು ಈಗ ಬಿಲಿಯನ್ ಡಾಲರ್ ಮೌಲ್ಯದ ಬೃಹತ್ ಹಣಕಾಸು ಸೇವಾ ಕಂಪನಿಯನ್ನು ನಡೆಸುತ್ತಿದ್ದಾರೆ. ನಿಖಿಲ್ ಕಾಮತ್ ಅವರು ಫೋರ್ಬ್ಸ್ 100 ಶ್ರೀಮಂತ ಭಾರತೀಯರ ಪಟ್ಟಿಯಲ್ಲಿ 40 ನೇ ಸ್ಥಾನದಲ್ಲಿದ್ದಾರೆ. ಈ ಮೂಲಕ ಮುಖೇಶ್ ಅಂಬಾನಿ, ಗೌತಮ್ ಅದಾನಿ ಮತ್ತು ಶಿವ ನಾಡಾರ್ ಅವರ ಸಾಲಿಗೆ ಸೇರಿದ್ದಾರೆ. ಕೇವಲ 37 ನೇ ವಯಸ್ಸಿನ ನಿಖಿಲ್ ಕಾಮತ್ ಈಗ ಭಾರತದ ಅತ್ಯಂತ ಕಿರಿಯ ಬಿಲಿಯನೇರ್ ಆಗಿದ್ದಾರೆ.
ಝೆರೋಧಾದ ಸಹ-ಸಂಸ್ಥಾಪಕರಾದ ನಿಖಿಲ್ ಕಾಮತ್ ಮತ್ತು ನಿತಿನ್ ಕಾಮತ್ ಅವರು ಫೋರ್ಬ್ಸ್ ಪ್ರಕಾರ USD 5.5 ಬಿಲಿಯನ್ ನಿವ್ವಳ ಮೌಲ್ಯವನ್ನು ಹೊಂದಿದ್ದಾರೆ ಎಂದು ತಿಳಿದು ಬಂದಿದೆ. ಇದು ಭಾರತೀಯ ಕರೆನ್ಸಿಯಲ್ಲಿ 45,700 ಕೋಟಿ ರೂಪಾಯಿ. ಇದಲ್ಲದೆ, ಝೆರೋಧಾದ ಒಟ್ಟಾರೆ ಮಾರುಕಟ್ಟೆ ಬಂಡವಾಳೀಕರಣವು 30,000 ಕೋಟಿ ರೂ. ಆಗಿದೆ.
ನಿಖಿಲ್ ಕಾಮತ್ ಅವರು ಭಾರತದ ಅತ್ಯಂತ ಕಿರಿಯ ಬಿಲಿಯನೇರ್ ಆಗಿದ್ದಾರೆ. ಆದರೆ ಅವರ ಸಾಧನೆ ಮತ್ತು ಉದ್ಯಮಶೀಲತೆಯ ಹಾದಿಯು ಸುಲಭವಾಗಿರಲಿಲ್ಲ ಎಂಬುದು ಗಮನಾರ್ಹ. ನಿಖಿಲ್ ಕಾಮತ್ ಅವರು ಓದಿನಲ್ಲಿ ಅಷ್ಟಾಗಿ ಗಮನಾರ್ಹ ಪ್ರಗತಿ ಕಂಡು ಬರಲಿಲ್ಲವಾದ್ದರಿಂದ ನಿಖಿಲ್ ಅರ್ಧಕ್ಕೆ ಶಾಲೆ ಬಿಟ್ಟಿದ್ದರು. 14 ನೇ ವಯಸ್ಸಿನಲ್ಲಿ ನಿಖಿಲ್ ಮೊದಲಿಗೆ ಆದಾಯವನ್ನು ಗಳಿಸಲು ಮೊಬೈಲ್ ಫೋನ್ಗಳನ್ನು ಮಾರಾಟ ಮಾಡಲು ಪ್ರಾರಂಭಿಸಿದರು. ಆದರೆ ಅವರ ತಾಯಿ ಕೋಪಗೊಂಡು ಎಲ್ಲಾ ಫೋನ್ಗಳನ್ನು ಟಾಯ್ಲೆಟ್ನಲ್ಲಿ ಫ್ಲಶ್ ಮಾಡಿದರು. ಅವರು ಕಡಿಮೆ ಅಂಕ ಪಡೆದ ಕಾರಣ ಆತನ ಶಾಲೆಯಲ್ಲಿ ಅವರನ್ನು 10ನೇ ತರಗತಿ ಪರೀಕ್ಷೆಗೆ ಹಾಜರಾಗಲು ಅನುಮತಿಸಲಿಲ್ಲ. ಕೊನೆಗೆ ಅವನು ಶಾಲೆಯಿಂದ ಹೊರಬಿದ್ದರು.
ಬಳಿಕ ತಕ್ಷಣಕ್ಕೆ ಕಾಲ್ ಸೆಂಟರ್ನಲ್ಲಿ ಕೆಲಸ ಮಾಡಲು ಪ್ರಾರಂಭಿಸಿದರು. ಇದರಿಂದ ತಿಂಗಳಿಗೆ ಕೇವಲ 8000 ರೂ ಗಳಿಸುತ್ತಿದ್ದರು. ಶೀಘ್ರದಲ್ಲೇ ಅವರು 2010 ರಲ್ಲಿ Zerodha ಅನ್ನು ಸ್ಥಾಪಿಸುವ ಆಲೋಚನೆ ಮಾಡಿದರು. ಈ ಕಂಪನಿಯು ತುಂಬಾ ಕಡಿಮೆ ಶುಲ್ಕವನ್ನು ವಿಧಿಸುತ್ತದೆ ಮತ್ತು ಕೇವಲ ಮೂರು ವರ್ಷಗಳ ವ್ಯವಹಾರದಲ್ಲಿ ಅದು 2000 ಕೋಟಿಗಳಷ್ಟು ನಿವ್ವಳ ಲಾಭವನ್ನು ಮಾಡಿತು.
ಈಗ ನಿಖಿಲ್ ಕಾಮತ್ ಮತ್ತು ನಿತಿನ್ ಕಾಮತ್ ಇಬ್ಬರೂ ತಲಾ 100 ಕೋಟಿ ರೂಪಾಯಿಗಳ ಸಂಬಳವನ್ನು ಹೊಂದಿದ್ದಾರೆ. ಅವರ ಅಪ್ಲಿಕೇಶನ್ ಝೆರೋಧಾ 1 ಕೋಟಿಗೂ ಹೆಚ್ಚು ಬಳಕೆದಾರರನ್ನು ಹೊಂದಿದೆ. ಪ್ರತಿಷ್ಠಿತ ಕಾಲೇಜು ಪದವಿಗಳನ್ನು ಹೊಂದಿರುವ ಜನರು ತಮ್ಮ ಕಂಪನಿಗೆ ಉತ್ತಮವಾದದ್ದನ್ನು ಆದ್ಯತೆ ನೀಡುವುದಿಲ್ಲ ಎಂದು ಅವರು ಐಐಟಿ ಮತ್ತು ಐಐಎಂನಿಂದ ಜನರನ್ನು ನೇಮಿಸಿಕೊಳ್ಳದಿರಲು ಪ್ರಯತ್ನಿಸುತ್ತಾರೆ.
